ಓಲೆ

ಕಾದಿಹನು ಜನಸಂತೆಯ ಒಂಟಿ ಬಾಳಿನಲಿ
ಅರಸುತಲಿಹನು ದೂರದ ಊರಿನಲಿ
ದಿನವ ಕಳೆಯುತಲಿಹನು ನಾಳೆಯ ಬರವಸೆಯಲಿ 
ನಗುತ ಹೊಳೆಯುತಲಿಹನು ಹಳೆಯ ನೆನಪ ಆಸರೆಯಲಿ

ಹೇಳದ ವಿಷಯ ಮೂಡಿತು ಕಾಗದದಿ
ಕೇಳದ ಆಶಯ ಗೀಚಿದ ಪದದಲಿ
ನೋಡದ ವಿಸ್ಮಯ ಓದುವ ಕಣ್ಣಲಿ
ಕಾಡುವ ತನ್ಮಯ ವಿರಹಿ ಮನದಲಿ

ಬರೆಯಲು ಮೂಡಿದ ಭಾವ ವಿಲಾಸದಿ  
ಬಂದಿತೊಂದು ಕಾಗದ ನಲ್ಲನ ವಿಳಾಸದಿ
ಬರಡುಭೂಮಿಯ ಚಿಲುಮೆ ಅವನ ಕೈಯಲಿ  
ಶಶಿ ಸೂಸಿದ ತಂಗಾಳಿ ಸುಡು ಬೇಸಗೆಯಲಿ

ಮನದ ಭಾವದ ಅನಾವರಣ ಖಾಲಿ ಹಾಳೆಯಲಿ
ಕನಸ ಪಾತ್ರಗಳ ಅವತರಣ ಪದಗಳ ದಾಳದಲಿ
ತನ್ನ ಪದಕೆ ಹೊಸ ಅರ್ಥ ಅವಳ ಕಾಗದದಿ
ಮೂಕ ಭಾವಕೆ ರಾಗವು ಅವಳ ಮಾತಲಿ

ನಿಮ್ಮ
ಕಾಮತ್ ಕುಂಬ್ಳೆ

ಏನೆಂದು ನಾ ಹಾಡಲಿ

ಏನೆಂದು ನಾ ಹಾಡಲಿ
ಅಪರಿಚಿತ ನೋಟದ ಆ ಸೆಳೆತಕೆ ಈ ನೋಟ ವಶವಾಯಿತು
ಭೇಟಿಯಾಗದ ಇಬ್ಬರ ಹೃದಯದ ಬೇಟೆ  ಶುರುವಾಯಿತು
ಪ್ರಣಯ ಕಾದಂಬರಿಗೊಂದು ಮುನ್ನುಡಿ ಬರೆದಂತಾಯಿತು
ಪಯಣಿಗ ನಾ ನಿಂತಾಗ ಜಗವೇ ಕೈಹಿಡಿದು ಮುನ್ನಡೆಸಿದಂತಾಯಿತು || ಏನೆಂದು ನಾ ಹಾಡಲಿ ||


ಕಣ್ಣು ಹುಡುಕುತಿದೆ ಹುದುಗಿಟ್ಟ ಪ್ರಿತಿಪಾಠದ ಸಂಚಿಯ
ಕಾಲು ಹಾತೊರೆಯುತಿದೆ ಹರಿದಾಟದ ಆ ತಿಳಿ ಸಂಜೆಯ
ತುಟಿಯಂಚು ತುದಿಗಾಲಲಿ ನಿಂತಿದೆ ಪ್ರಣಯದ ಮಾತು ಉದುರಿಸಲು
ಗುಳಿಯೊಂದು ಕಾರಣ ಹೇಳದೆ ಮೊಗ್ಗಿನ ಗಲ್ಲದಲಿ ಅರಳಿತು || ಏನೆಂದು ನಾ ಹಾಡಲಿ  ||


ಮುಂಗುರಳ ಲಾಲಿಗೆ ಚಂದಿರ ಮಲಗಿದ ಮೇಘಚಾದರಹೊದ್ದು
ನಯನಶರ ಧಾಳಿಗೆ ಬಿಲ್ಲೊಂದು ಕಳಚಿತು ಬಣ್ಣವ ಮಳೆಯಲಿ ಮಿಂದು 
ಗೆಜ್ಜೆಯ ಝೇಂಕಾರಕೆ ಭ್ರಮರವು ಕಮಲದೊಡಲಲಿ ಮಂಪರು
ಲಜ್ಜೆಯ ವೈಯ್ಯಾರಕೆ ನವಿಲು ಸ್ಥಪತಿರಚಿತ ಒಂಟಿಕಾಲ ಶಿಲ್ಪ || ಏನೆಂದು ನಾ ಹಾಡಲಿ ||

ನಿಮ್ಮ
ಕಾಮತ್ ಕುಂಬ್ಳೆ